Silvaplauna spordscha üna granda variaziun: Persunaliteds cuntschaintas s'haun inachüertas già bod da sia bellezza. Il ravarenda e cumandant da militer Jürg (Güerg) Jenatsch ho per exaimpel passanto sia infanzia illa chesa da pravenda da Silvaplauna, aunz ch'el ho güdo cun astuzcha da deliberer il Grischun düraunt la Guerra da trent'ans. Eir il purtret «Der Silvaplanersee im Herbst» demuossa inspiraziun: in möd incumparabel pittüra l'artist Ferdinand Hodler il reflex spectaculer da las muntagnas sül Lej da Silvaplauna.
Silvaplauna festagia eir las üsaunzas: minch'an da prümavaira vegnan pigliedas notiers las s-chellas per ir a Chalandamarz. S-chelland, giaschland e chantand vo il cortegi tres vschinauncha. L'üsaunza dals 1. marz dess s-chatscher l'inviern ed es gnida cuntschainta tres l'istorgia d'iffaunts «Uorsin» da Selina Chönz.
Tals bains culturels quintan eir il Chastè Crap da Sass e la baselgia refurmeda chi vain numneda la prüma vouta dal 1356. Las societeds da Silvaplauna daun vita ed identited a la vschinauncha. Saja que pervi da las activiteds sportivas u pervi da la varieted culturela – a vela la paina da gnir a resentir il puls da vita da Silvaplauna.
Chalandamarz
Il Chalandmarz es ün'üsaunza fich veglia da derivanza pajauna. «Chalanda» significha il prüm di dal mais e Chalandamarz es dimena ils 1. marz. Fin aint pel 8evel tschientiner eira ils 1. marz il prüm di da l'an. Hoz es il Chalandamarz la festa d'iffaunts la pü importanta in Engiadina. Il s-chellöz dals iffaunts dess s-chatscher l'inviern. Tuot la festa vain organiseda da las scolaras e'ls scolars dal s-chelin ot. Già eivnas aunz la festa cumainzane culs preparativs. Las scolaras e'ls scolars haun differentas caricas e lezchas. Insembel cul aperitiv sülla Plazza dal Güglia do que üna fich bella festa. Nus L'invidains cordielmaing d'imprender a cugnuoscher quist'üsaunza veglia.
Aunch'aunz cha'l sulagl in favrer cucca surour las muntagnas cuviertas da naiv, as mettan ils giuvens a Champfèr e Silvaplauna a la lavur. Els piglian notiers las schlittas e las preparan per lur pitschen viedi. Zieva avair miss suot ils chavals, tirane aint lur fracs e cilinders e vaun tar lur marusas. La schlitteda es ün'üsaunza chi exista daspö 200 ans in Engiadin'Ota. Da pü bod eira la schlitteda scu ün spusalizi. Sch'üna duonna gniva invideda a la schlitteda, schi vaiva l'hom intenziuns seriusas. Hozindi nun es üna tela relaziun d'amur pü la premissa per as parteciper. Ma scu da pü bod tschaintan las duonnas aunch'hoz davauntvart sülla schlitta, intaunt cha'ls homens staun in pè davous ellas, tgnand ils frandaivels. Las sunaglieras dals chavals sclingian ligermaing, düraunt cha las schlittas passan tres la cuntredgia d'inviern.
Silvaplauna es üna vschinauncha monolingua. La lingua oriunda es il rumauntsch puter. Las linguas ufficielas sun tudas-ch e rumauntsch.
La lingua retorumauntscha vain discurrida in Svizra da var 60 000 umauns. Ad existan tschinch differents idioms. Il rumauntsch es la quarta lingua naziunela e vain gugent chüro a Silvaplauna. Ils iffaunts vegnan instruieus illa scoula primara in rumauntsch puter.
Baunchins
Silvaplauna spordscha la pussibilted da posseder ün egen baunchin – i'l vair sen dal pled latin «possidere» (be-sitzen): ch'Ella/El as tschainta sün Sieu baunchin da Silvaplauna e ch'Ella/El gioda la bella vista. Ils baunchins servan scu lö da fer la posa, dessan però eir imbellir e mantgnair l'aspet da la vschinauncha. Els vegnan plazzos tenor bsögn e pussibilted lung las sendas.
Dvanter sponsura u sponsur d'ün baunchin
Scu sponsura u sponsur ho Ella/El la pussibilted d'imbellir l'aspet da la vschinauncha cun ün baunchin cun Sia dedicaziun persunela. Ils lavuraints cumünels installeschan il baunchin al lö cunvgnieu.
Actualisaziun da las datas dals sponsuors da baunchins
Es Ella/El già üna sponsura u ün sponsur d'ün baunchin? Gugent vulessans actualiser las datas.
Chera sponsura e cher sponsur d'ün baunchin da Silvaplauna, nus essans landervi d'actualiser las datas da mincha sponsur d'ün baunchin existent. Ch'Ella/El ans trametta per plaschair ün e-mail cullas seguaintas infurmaziuns: lö da Sieu baunchin, dedicaziun e data d'installaziun (scha cuntschainta). Da tuot las inoltraziuns trainsa la büs-cha per üna fin d'eivna a Silvaplauna per duos persunas. Grazcha fich ed inavaunt bger plaschair vi da Sieu baunchin da Silvaplauna.
Andreas Kasper
E-Mail
Baselgias e religiun
Daspö l'an 1556 es la vschinauncha da Silvaplauna protestanta. Sül territori da Silvaplauna as chatta trais baselgias da differents temps. Sper las baselgias evangelicas Santa Maria e San Rochus exista daspö il 1964 la baselgia catolica Sant'Anna.
