Wo befinden sich die Defibrillatoren auf dem Gemeindegebiet von Silvaplana?
Die Standorte können hier eingesehen werden.
Baselgias e religiun
Baselgias evangelic-refurmedas
«L'g principi da la sabgentscha ais la tema da Dieu. Dijsch sabbi Sallamung»
text originel da l‘an 1608
«Il principi da la sabgentscha es la temma da Dieu, disch il sabi Salomon.» Quist vers biblic as chatta sülla prüma pagina dal «Cudesch Cotschen» da la vschinauncha da Silvaplauna chi porta la data dals 29 november 1608. Que's tratta d’üna traducziun dal latin in rumauntsch, fatta dad Israel Jenatsch, il bap dal cuntschaint Jürg (Güerg) Jenatsch. Israel Jenatsch es sto dal 1586 al 1588 ravarenda a Silvaplauna. Dal 1588 al 1599 es el sto in uffizi a San Murezzan ed a Lon illa Muntagna da Schons. In seguit è'l darcho turno illa pravenda da Silvaplauna, inua ch'el ho lavuro fin a sia mort als 19 schner 1623. Sieu figl Jürg (Güerg) Jenatsch, chi pü tard ho influenzo per part l'istorgia grischuna, ho passanto sia infanzia a Silvaplauna.
Baselgia Santa Maria a Silvaplauna
La baselgia la pü veglia sül territori cumünel da Silvaplauna es la baselgia evangelica Santa Maria.
La valur istoric-culturela da la Baselgia Santa Maria, fabricheda tresour i'l stil architectonic da la gotica tardiva, es considerabla.
Fats interessants
In occasiun da la restoraziun l'an 1974/1975 ho il servezzan archeologic dal Grischun fat s-chevamaints e chatto restaunzas d'ün edifizi drizzo vers ost cun üna nev rectangulera ed ün cour in fuorma da fier d'chavagl. L'expert federel prof. Sennhauser ho dato quista baselgia pü veglia i'l ündeschevel tschientiner. Uschè cha's po cun granda sgürezza partir dal fat cha nossa vschinauncha d'eira populeda già intuorn l'an 1000, püprubabel già pü bod.
L'istorgia
ca. 11evel tschientiner: construcziun da la baselgia oriunda, scuvierta in occasiun d'ün s-chevamaint dal 1974/75
1356: La Baselgia Santa Maria vain manzuneda per la prüma vouta.
1491: construcziun nouva dal cour da la baselgia tres maister Steffan Klein
1556: introducziun da la refurmaziun; refurmatur in Engiadina: Petrus Paulus Vergerius
1681: renovaziun da la baselgia
1873: renovaziun da la baselgia
1904: construcziun da l'orgel actuel tres la firma Gross, Lucerna
1906: renovaziun da la baselgia
1972: inauguraziun da la nouva sunasencha (3. sain)
1975: renovaziun da la baselgia, s-chevamaints archeologics
1988: renovaziun da l'orgel tres la firma Kuhn, Männedorf
2020: restructuraziun dals contuorns e dal clucher «Baselgia sülla plazza»
Baselgia San Rochus a Champfèr
La baselgia refurmeda a Champfèr ho survgnieu sieu nom da Rochus, ün hom giuven e rich da la Frauntscha dal Süd chi s'ho convertieu a la cretta cristiauna ed ho fat ün viedi da pelegrinedi a Roma. Siand duno cun forzas curativas, es el dvanto fliunz da persunas amaledas da la pesta. In viedi vers chesa è'l svess gnieu amalo da la pesta, ma es darcho guarieu. In sia patria l'haune però scugnuschieu e dafatta miss in praschun. Lo è'l mort dal 1327 ill'eted da be 32 ans.
Fats interessants
Il fabricat gotic tardiv eira oriundamaing be orno cun ün clucheret. Il grand clucher es gnieu pür cul turissem. Giasts inglais regulers dal Julierhof haun finanzio dal 1878 il fabricat. Per la peja haun els survgnieu il dret d'ospitalited per lur cults divins anglicauns. A listess temp es eir gnida renoveda la baselgia. Il clucher es daspö lo in possess da la vschinauncha da Silvaplauna. Ün dals duos sains dal clucher deriva da la Baselgia San Niculo da Surlej chi d'eira gnida devasteda d'üna bouda dal 1834. Eir ils baunchs da lo haun chatto ün nouv adöver illa Baselgia San Rochus. Oriundamaing as rechattaiva il sunteri be güst davous la baselgia. Daspö 100 ans es quel uossa a l'ur da la vschinauncha vers Albanella.
Daspö 501 ans ho San Rochus passanto bgeras istorgias. A sun gnidas fattas renovaziuns i'ls ans 1904, 1951, 1976 e 1993. Dal 1986 sun gnidas sanedas las fatschedas e la fundamainta. Innumbrabels ed innumbrablas ravarendas haun druvo quist edifizi per lur celebraziuns e predgio giò da la chanzla. Pitschna ma bellina, perque eir pachifica e prüveda, uschè as preschainta la baselgia dadainsvart. Immez la maisa da battaisem, inua cha iffaunts gnivan e vegnan battagios e confirmos, inua cha vain celebreda la Sencha tschaina ed eir piglio cumgio. Quecò nu s'ho müdo neir zieva passa 500 ans. Il pitschen orgel da baselgia fo vibrer il local cun sieu cling unic. I'l center penda plain superbgia ün lampadari. Las fnestras daun culur al local. Ernst Rinderspacher eira ün artist da vaider da Basilea chi ho passanto sieus ultims ans da vita illa Val Fex. Grazcha a la lungia amicizcha cul ravarenda Ernst Schulthess es la baselgia gnida decoreda cun sias fnestras in culur. Rinderspacher ho lavuro cullas culuors da l'Engiadina, uschè cha scenas da l'evangeli sun colliedas cull'Engiadina. La baselgia figürescha i'l inventar chantunel dals edifizis degns da gnir protets ed es cotres suot protecziun da monumaints. La Baselgia San Rochus, ün lö speciel in vschinauncha, chi daro auncha bgers ans – spraunza annorums – la taimpra al purtret da la vschinauncha da Champfèr e battaro punctuelmaing las uras.
L'istorgia
1521: construcziun da la baselgia
1878: renovaziun e construcziun dal clucher
1878: sain nouv: culo dal sain vegl e'l sain da la Chapella San Niculo
1951: renovaziun ed installaziun da trais fnestras cun pittüra sün vaider
Baselgias catolicas
Baselgia Sant'Anna
La baselgia catolica Sant'Anna a Silvaplauna ho üna cuorta istorgia.
L'an 1964 es la baselgia catolica da Silvaplauna gnida fabricheda. 30 ans pü tard, dal 1994, eira que dvanto necessari da saner l'edifizi. In quist'occasiun es naschida l'ideja da definir l'interiur in nouv möd e da'l der üna fuorma da mezza ellipsa. A l'architect Renato Maurizio da Malögia es que reuschieu cun mezs simpels da der ün caracter individuel al local. Il gö da glüsch e sumbriva, ils cuntrasts tres la tscherna da culur e materiel – il fuonz da crap da s-chaglia grisch-nair, las paraids d'ascher, il palintschieu sur da gess alv – dessan güder a s-chaffir ün'atmosfera agreabla. Il cuntschaint artist puschlavin Paolo Pola fo frunt a las dimensiuns orizontelas dal local elliptic cun üna paraid verticala libra i'l cour da la baselgia. Quista paraid blova es purtedra d'ün disegn plastic da metal. Impü ho Pola cumponieu ils lös liturgics 'altar', 'ambon' e 'crap da battaisem' scu queders simpels, tals quêls ils materiels metal, marmel e lain fuorman üna simbiosa.
Baselgia San Niculo a Surlej
La baselgia evangelica es gnida fabricheda l'an 1757, «... illa quela ho lö mincha terza dumengia la seguonda predgia.» Ils cults divins sun gnieus salvos lo fin ch'ün'ovazun in settember da l'an 1834 ho desdrüt la baselgia.
Fats interessants
Als 30 gün 1793 es la vschinaunchetta da Surlej gnida dannageda fermamaing d'ün'ovazun. Üna part da las chesas engiadinaisas massivas haun tgnieu püt a las ovatschas. Ma ils murütschs e'ls uigls s'haun implieus cun belma e greva u sun gnieus desdrüts. Per furtüna nun ho que do üngünas victimas. A Surlej vaiva que do già dal 1772 ün'ovazun pü granda e'ls abitants eiran fügieus cun lur bains movibels a Silvaplauna.
Las chesas devastedas sun gnidas sbudedas fin süllas ruinas chi d'eiran visiblas auncha bgers decennis. Il materiel druvabel es gnieu reütiliso per fabricher nouvas chesas a Silvaplauna. Las restaunzas da la Chapella San Niculo, fabricheda dal 1757, sun gnidas sbudedas pür dal 1955. Als 14 schner 1854 ho la vschinauncha burgaisa da Silvaplauna decis da druver il sain da la baselgia da Surlej e'l sain pitschen da la baselgia da Champfèr per culer landrour ün sain grand. Quel eira previs per la baselgia da Champfèr.
L'istorgia
1757: construcziun da la Chapella San Niculo a Surlej
1854: Il sain vain fundieu insembel cul sain pitschen da la baselgia da Champfèr per culer landrour ün sain grand per la Baselgia San Rochus.
1955: La ruina da la Chapella San Niculo a Surlej vain sbudeda.
