Fats e cifras da la vschinauncha da Silvaplauna

Il svilup da la populaziun a Silvaplauna, Surlej e Champfèr es gnieu tradieu differentamaing. L'an 1804 vivaivan 348 abitants in 69 edifizis e 76 chasedas. L'an 2000 d'eiran que 927 abitants in 490 chasedas. Hoz sun que var 1100 abitants.

Bgers umauns da Silvaplauna sun eir emigros in tuot las direcziuns in tschercha da megldras cundiziuns da viver. Tschertüns d'els s'haun adattos ed haun gieu il success giavüscho, pelpü scu cafetiers e pastiziers. Oters sun ieus in malura da l'increschantüna u sun turnos povers a chesa.

Svilup dal numer d'abitants dal 1645 al 2019

Vschinauncha da Silvaplauna (incl. fracziuns Surlej e Champfèr)

Las annedas las pü importantas

2022 - Il giratori d'immez vain fabricho.

2020 - La butia da vschinauncha da Champfèr vain surdeda a gestiunaris privats.

2020 - La filiela da la Banca Chantunela Grischuna vain serreda.

2018 - La filiela da la posta vain serreda ed a vain avierta l'agentura da la posta illa i-Lounge 3303.

2018 - L'electrobus penduler gratuit vain miss in funcziun.

2018 - La Plazza dal Güglia e la zona d'inscunter vegnan restructuredas.

2018 - Il tunnel da sviamaint dal Güglia vain inauguro.

2018 - La punt da Surlej vain saneda ed uzeda.

2013 - La Scoula sportiva a Champfèr vain avierta (scoula dal di da talents).

2012 - La butia da vschinauncha da Champfèr vain surpiglieda da la vschinauncha da Silvaplauna.

2010 - Las lavuors da fabrica dal sviamaint da Silvaplauna cumainzan.

2009 - Las scoulas primaras da Silvaplauna e Champfèr fusiuneschan.

2008 - La scoula reela da Silvaplauna vain serreda.

1999 - La sarinera nouva illa collina da Crest'Alta vain missa in funcziun.

1980 - La chesa da scoula nouva i'l center da Champfèr (territori cumünel da San Murezzan) vain inaugureda.

1973 - La prüma sarinera vain missa in funcziun.

1972 - La chesa da scoula nouva a Silvaplauna (scoulina, scoula primara e reela) vain inaugureda.

1963 - La baselgia catolica Sant'Anna a Silvaplauna vain fabricheda.

1963 - La pendiculera da Corvatsch (Surlej - Murtèl) vain missa in funcziun.

1955 - La ruina da la baselgia San Niculo vain alluntaneda.

1950 - Per mantgnair la cuntredgia dals lejs d'Engiadin'Ota vain fat ün contrat culla Pro Lej da Segl.

1906 - Il Chastè Crap da Sass vain fabricho.

1834 - Ün'ovazun desdrüa la baselgia San Niculo.

1767 - Bouda a Surlej. La vschinauncha da ruinas resta abanduneda fin tar la fabrica da la pendiculera da Corvatsch.

1757 - La baselgia evangelica San Niculo a Surlej vain fabricheda.

1521 - La baselgia evangelic-refurmeda San Rochus a Champfèr vain fabricheda.

1356 - La baselgia evangelica Santa Maria a Silvaplauna vain documenteda per la prüma vouta.

1288 - Silvaplauna vain documento per la prüma vouta.