La Fundaziun KiBE (chüra d'iffaunts) in Engiadin'Ota sustegna e cussaglia a genituors in tuot las dumandas da la chüra d'iffaunts cumplementera a la famiglia. Ella maina las quatter canortas Capricorn a Puntraschigna, Chüralla a Samedan, Muntanella a San Murezzan e Randulina a Zuoz e spordscha plazzas in famiglias dal di in tuot l'Engiadin'Ota. Totelmaing vegnan spüertas 114 plazzas da chüra in canortas. Per chi chi preferescha ün ambiaint pü familier, s'adattan las famiglias dal di. Per iffaunts ill'eted da 3 mais a 16 ans procura la Fundaziun KiBe plazzas da chüra in famiglias dal di amuraivlas e premurusas. Ils genituors dal di chüran a Lur iffaunts a chesa in ün ambiaint familier – regulermaing, ad uras, düraunt mezs dis u dis inters.

Illa gruppa da gö da Silvaplauna, mneda in möd professiunel, haun iffaunts da trais e quatter ans la pussibilted da's preparer optimelmaing per la scoulina. Ils iffaunts imprendan illa gruppa da gö sper abilteds da motorica fina e groba eir da giuver in möd sociel ün cun l'oter. La gruppa da gö da Silvaplauna es facultativa, po però esser ün grand avantag per iffaunts prümgenuieus, iffaunts unics u iffaunts da linguas estras. In mardi e venderdi bunura da las 8 a las 10.30 accumpagna e sustegna l'educatura d'iffaunts pitschens diplomeda Gabriela Eberhart ils iffaunts illa canorta in chesa da scoula da Silvaplauna.

Illa gimnastica per mamma-iffaunt u bap-iffaunt imprendan ils iffaunts in möd ludic a fer cupiroulas, a clapper e bütter ballas e bger oter. Ill'eted da trais fin tschinch ans as mouvan ils iffaunts gugent in üna gruppa cun oters iffaunts e creschieus. Ch'Ella/El vegna cun Sieu iffaunt a fer gimnastica in Sia vicinanza.

La cussagliaziun da genituors da la Fundaziun pel provedimaint da sandet d'Engiadin'Ota (FPSEO) es respunsabla per l'Engiadin'Ota e Bassa scu eir per las valledas dal süd.

La cussagliaziun da genituors es üna spüerta chi sustegna a famiglias ed es il prüm post da consultaziun in connex cun dumandas da tuottas sorts davart la promoziun tampriva, da la naschentscha fin ill'eted da tschinch ans. La cussagliaziun da genituors es facultativa, gratuita e confidenziela e vain sustgnida da l'Uffizi da sandet dal Grischun.