Al lej, illas muntagnas, adüna cun vent

Silvaplauna es situo immez la cuntredgia da lejs da l'Engiadin'Ota e celebrescha il vent da Malögia culs sports nautics ils pü actuels e sia muntagna da chesa «Corvatsch» cul restorant panoramic il pü ot da las Alps Orientelas.

La vschinauncha politica da Silvaplauna consista daspö la spartiziun territoriela l’an 1538 da Silvaplauna e las fracziuns Surlej e Champfèr cun Albana. Silvaplauna vain documento per la prüma vouta dal 1288. Già quella vouta vain rapporto d’üna fusiun cun «Surleich» e «Chiamfer». Que es prubabelmaing il cumanzamaint da la colliaziun definitiva cullas duos fracziuns Surlej e Champfèr. Scu cunfin traunter San Murezzan e Silvaplauna vain determino da quel temp l'Ova da Suvretta. Cotres es Champfèr hoz trapartieu politicamaing.

A Silvaplana vain discurrieu rumauntsch puter. Uschè es eir la lingua d'instrucziun fin e cun la terza classa rumauntsch. Pervi dal grand augmaint da la populaziun (bgeras famiglias d'otra lingua) es la populaziun rumauntscha uossa illa minurited. La Confederaziun e'l Chantun faun però grands sforzs per mantgnair la lingua rumauntscha.

Uschè s'ho furmo Silvaplauna

La cuntredgia da lejs d'Engiadin'Ota s'ho furmeda tres la retratta dals vadrets. Ils lejs dad hozindi d'eiran collios da pü bod. Il delta, sül quêl Silvaplauna as rechatta hoz, pera da s'avair furmo in consequenza d'üna bouda giò dal Piz Güglia (da pü bod Piz Munteratsch). Istorikers suppuonan cha l'Ova dal Vallun hegia transporto massas da crappa millennis a l'inlungia giò la val. Cun fabricher ils edifizis d'hozindi s'ho suvenz chatto la listessa crappa cotschna scu sül Pass dal Güglia. Il delta separa il lej sur dal lej suot – voul dir il Lej da Silvaplauna dal Lej Suot e'l Lej da Champfèr. Al lö il pü stret as rechatta üna punt chi collia Silvaplauna cun Surlej. Il lej vers Champfèr vain trapartieu in duos parts tres la pitschna penisla «Piz». La part traunter la punt e la penisla vain numneda Lej Suot e la part zieva la penisla Lej da Champfèr.