Nossa vschinauncha
Silvaplauna es üna da las vschinaunchas da la planüra dals lejs d’Engiadin’Ota. Il vent da Malögia pussibilitescha tuot ils sports süll’ova chi sun hoz actuels. Il Piz Corvatschs es be üna da sias muntagnas da passa 3000 m.s.m e sün sieu piz as rechatta il restorant da panorama situo il pü ot da las Alps orientelas.
La vschinauncha chi’s cumpuona da Silvaplauna, Champfèr e Surlej derasa scharm simpatic cun sias numerusas pussibiliteds dad sport ed attracziuns scu eir cun sias spüertas da l’hotellaria e gastronomia.
Sportists paschiunos chattan cò tuot tenor lur gust. Il fidel vent da Malögia procura per tuot las variantas da surf. Sendas panoramicas e da quellas dals Romauns sun ün eldorado per bikers e viandants.
A Silvaplauna haun lö bgeras occurenzas da sport scu p.ex.Engadinwind, Engadin Bike Giro u Engadin Swiimrun. In nossa vscinauncha as chatta bod tuot be na la lungurella.
Cultura ed üsaunzas
Silvaplauna spordscha eir variaziun culturela. Jürg Jenatsch, il cuntschaint ravarenda, politiker e coductur da militer ho passanto sia infanzia illa Chesa da pravenda a Silvaplauna. Illa Guerra da trent’ans ho’l delibero il Grischun da la guerra cun astuzcha e tradimaint. L’artist Ferdinand Hodler s’ho lascho inspirer da la cuntredgia e sieu cuntschaint purtret „The fall in Silvaplana“ pittüro a la riva dal lej ed in cumbat cul vent datescha dal 1907.
Als 1. marz, pel solit es auncha fraid e naiv, vaun ils iffaunts chantand e s-chelland tres vschinauncha per
s-chatscher l’inviern e clamer la prümavaira. Cull’istorgia da l’Uorsin scritta da Selina Chönz ed illustreda dad Alois Carigiet es il Chalandamarz cuntschaint a minchün.
Tals bains culturels tuochan la bselgia refurmeda chi vain manzuneda la prüma vouta dal 1396 e’l Chastè Crap da Sass. Las societeds dal lö daun vita ed indentited a la vschinauncha. Imprender a cugnuoscher Silvaplauna pü bain es ün inrichamaint saja que cullas activiteds sportivas u culla spüerta culturela
